Zum Gedenken an 100 Jahre Österreich:
100 joa österreich
seit hunderd joa, des is ned neich
gibts unser laund, gibts österreich!
drum wird jetz gfeiad rund ums joa
und vüh drau dochd, wia ois so woa.
aum aunfaung hods ned rechd vüh gem
di glaubd haum, dass ma übalem
vom kaiserreich, der gloane rest
des hod di leid scho ziemlih gschtresd
„deutschösterreich“ woar zersd da naum
doh den woits auslaund goa ned haum
di sieger haum do reklamierd
so woa des "deitsch" glei ausradierd
a gauns schens neichtl hods noh brauchd
und mauncha kopf hod desweng grauchd
bis olle grenzn, klipp und kloa
entschiedn woan, fia olle joa
zan zoin haums zersd noh d'kronen ghobd
doh daun hod inflation so tobd
das d'währung oafoch umgschtöd haum
da schilling woa ob jetz ea glaum
und daun: di goidnen zwanzga joa
bis nochn freitog ois gauns anders woa
da börsnkrach, des woa a schlog
fia d'gaunze wöd, des is koa frog!
di dreißgerjoa, di woan daun schlecht
weu koana woa den aundern recht
mehr gegn- ois wia midanaund
woans rundherum im hoamadlaund
di schware zeid in unsern laund
wo nochbarn kämpfd haum genganaund
di soid uns oiweu lehre sei:
nur midanaund mochsd wege frei
doh daumois woans hoid ned bereit
fia fairness und fia menschlichkeit
an sündnbock haum sa sih gsuachd,
den haums gemeinsaum daun vafluachd.
und so is finster wuan in österreich
da hitler mid sein drittn reich
hods gaunze laund glei überschwemmt
mid judnhoss und braune hemd
da kriag woa grauslich, schiach, varuggd
di hoibe wöd hoda zadruggd!
sovüh vanicht, ma kaus ned glaum,
es woa ois wia a finstra traum
nochn kriag haumsas kapierd,
das österreich erst daun wos wird
waun reschpekt und toleranz
ersetzn hoss und schiache tanz
mid gauns vüh gschpia und noh mehr krofd
haums daun des wunder wirklih gschofd
und österreich mid oller mochd
auns liachd gfiad aus da finstan nochd
des carepaket, da marschallplan
woan godseidaunk koa lehra wahn
des hod vüh ghoifn, des is kloa
di soch, di woa gauns wunderboa
di vier im jeep, di woan a losd
so mauncha hod de richtig ghosd
do hods im laund vier grenzn gem
des woa ned scheh fia unsa lem
doh endlih, aun an schiachn dog
so mitte mai: da schdodsvertrog
mia woan jetz endlih frank und frei
d'neutralität koa hexarei!
vo jetz au, kau ma ruig song
is aufwärts gaunga, ohne klong
österreich, des gloane laund
woa rundherum boid aunerkaund
natürlih woa da weg noh weid
vo daumois bis in d'heitge zeid
doh olle woan drau intressierd
dass unser zukunfd besser wird.
jetz gehds uns guad unds laund is scheh
gauns friedlih kau ih durchi geh
ih fiachd mih ned vor kriag und gwoid
kau ungschaut song wos ma ned gfoid
zwoa is ah heid ned ois perfekt
und maunches goa grod jetz defekt
doh midanaund und olle zsaum
kennt ma des beste werkl haum
drum bi ih schdoiz auf unser laund
so wia mas gmochd haum midanaund
zan glick bi ih, des is ned neich
do geborn, in österreich